香港樓價貴係豬年不變嘅定律,上年有個中國富豪用3億,買咗山頂一個1361尺嘅單位,創下22萬一尺嘅分層豪宅尺價世界紀錄,咁你就知有幾癲!但如果你以為3億已經係天文數字,咁你就錯!喺美國就出現咗個美國樓市史上最貴嘅樓盤,要成2.5億美金,即係20億港紙!20億係幾多?只你要中20次1億金多寶就可以買到!貴,當然係賣點之一;但另一個賣點係:入面乜嘢都有!話明乜都有,咁就一定唔細啦!首先,佔地已經38000呎、樓高4層,有12個睡房、21個廁所、3個浴室、六個Bar、一個Spa房、Gym房、2個酒窖同1個85尺長嘅泳池,前前後後用咗用四年,請夠300位工人至起好!不過,佢最值錢嘅,唔係佢有幾大同有幾多房;係佢唔知點解會「送」好多嘢畀你!首先,全屋傢私電器就好基本,第一層係娛樂場,當中設有四條保齡球道加12個黃金保齡球瓶(當然係裝飾用啦~)、4部足球機、一張價值12000美金(約9.3萬港紙)嘅桌球檯、一張玻璃製乒乓球球檯同一整幅牆嘅某品牌糖果!你以為就得咁多?錯啦,收得你2.5億,邊止咁少~保齡球道隔離就有個James Bond主題、用成200萬美金起嘅私人影院,一共可以容納40人,用意大利手製皮革包裹嘅座椅可以瞓直,前面就有個22尺嘅螢幕加4K投影機,再加57個喇叭同16個Subwoofer組成嘅音響,可以播放超過7000套戲,更可以用嚟打機。你話咁嘅套配,仲洗咩出街?再行過少少,就見到幾架車,不過唔係普通車,係12架有錢都未必買得到嘅古今中外名車!包括:全球只得一部,價值200萬美金嘅Pagani Huayra、曾經創下拍賣紀錄,價值1500萬美金,1936年出產嘅Mercedes-Benz 540K Special Roadster,連員工車都有部法拉利488同特製嘅遊艇主題Rolls Royce Dawn。好恐怖呀!想上二樓,你可以搭用鱷魚皮裝飾嘅升降機(講緊有2部⋯),或者行嗰條盛惠200萬美金嘅鋼製樓梯!上到去,你會見到分成戶內戶外兩部份嘅廚房、一條瀑布、一座價值100萬嘅Leica巨型裝飾同另一條價值200萬嘅螺旋樓梯。外面就係嗰個睇盡洛杉磯景色嘅85尺泳池,泳池仲附送按摩浴池、酒吧,再加一個18×12尺嘅4K電視,同樣價值200萬。睇到呢度,係味嚇死咗呢?但售樓公司就無再公開其他嘅樓層,可能只有部分潛在客戶先睇得~不過,都有圖睇嘅,睇下當住咗算啦⋯除咗上面所有嘢,再加7個工作人員,包括:廚師、司機、按摩師等等⋯同好多無數出黎嘅藝術品、裝飾,咁就值2.5億美金。雖然係天文數字,但性價比都幾高!淨係睇下個呎價都只係五萬幾蚊,同上面22萬一尺嘅「豪宅」比,你話邊樣抵啲?想睇多啲?自己上去睇:http://www.924belair.com/#home

This article is automatically posted by WP-AutoPost Plugin

Source URL:http://baby.popart.hk/newweb/archives/24305

Leave a Reply